काठमाडौँ। नेपाली नारी समाज पोर्चुगलले १११औँ अन्तरराष्ट्रिय महिला श्रमिक दिवसको अवसर पारेर आज भर्चुअल ‘महिलाको सुरक्षा र चुनौती’ कार्यक्रम आयोजना गरेको छ।
कार्यक्रममा नेपाली काँग्रेसकी नेतृ सुजाता कोइरालाले नीति निर्माण तहमा महिला सहभागिता बढ्न नसकेको चिन्ता व्यक्त गरेकी छन्।
उनले आज आयोजना गरेको भर्चुअल ‘महिलाको सुरक्षा र चुनौती’ छलफल कार्यक्रममा महिला अधिकार सम्बन्धी नेपालको संविधानको प्रावधान कार्यान्वयन माग गरिन्।
उनले आर्थिक, सामाजिक तथा राजनीतिक लगायत नीति निर्माण तहमा सरकारले महिलाको अर्थपूर्ण सहभागिता आवश्यकतामा जोड नदिएको बताइन्।
नेपाल महिला संघकी केन्द्रीय अध्यक्ष उमा रेग्मीले घरेलु हिंसा तथा बलात्कारका घटना न्यूनिकरणका तथा महिला अधिकारका लागि राज्य संवेदनशील बन्नुपर्ने बताइन् ।
कार्यक्रममा नेपाली कांग्रेस महिला विभागकी केन्द्रीय सचिव लक्ष्मी खतिवडा, अधिवक्ता विष्णु बस्याल र लैगिंक विशेषज्ञ डा ज्योति तुलाधर, गैरआवासीय नेपाली संघ पोर्चुगलका अध्यक्ष तिलक गैरे, जनसम्पर्क समिति बेल्जियम अध्यक्ष सीता सापकोटा, अन्तरराष्ट्रिय साहित्य समाज पोर्चुगलका अध्यक्ष विनोद धिमाल जनसम्पर्क समिति पोर्चुगलका अध्यक्ष विनोद घिमिरे, नेपाली नारी समाज पोर्चुगलका संस्थापक अध्यक्ष सीता बरालले महिला दिवसमा महिलाको हकअधिकारमा कार्यक्रम मात्रै नभही, नामको मात्रै नभई, साच्चिकै महिलाको अर्थपूर्ण सहभागिता हुनुपर्नेमा विचार राखेका थिए।
