सिन्धुपाल्चोक, चौतारा । चौतारामा निर्माणाधीन मिनि रंगशालाको काम चार वर्ष बितिसक्दा पनि आधा मात्र सम्पन्न हुँदा बागमती प्रदेश सरकारले म्याद फेरि एक वर्षका लागि थप गरेको छ। अब यो योजना २०८२ असार मसान्तसम्म सक्नुपर्नेछ।
२०७७ असार २३ गते सम्झौता भई सुरु गरिएको रंगशाला निर्माण १८ महिनामा सक्ने लक्ष्य थियो। तर, ठेक्का लिएको गिरि–सुनकोसी जेभीले तोकिएको समयमै काम नसक्दा दुईपटक म्याद थप गरियो। अन्ततः २०८० चैत २२ मा ठेक्का तोडियो। सरकारको खरिद नियमावलीको १४औं संशोधनले एकपटकको लागि म्याद थप्ने व्यवस्था गरेपछि पुनः निर्माण कार्य अघि बढाउन म्याद थप गरिएको हो।
खेलकुद गतिविधि ठप्प, मैदान वैकल्पिक प्रयोगमा
निर्माण कार्यका कारण टुँडिखेल प्रयोगबाहिर रहँदा चौतारामा कुनै ठूला खेल प्रतियोगिता वा प्रशिक्षण हुन सकेका छैनन्। वैकल्पिकरूपमा मेलचौरको दरबारडाँडा मैदानमा सीमित गतिविधि भइरहेका छन्, तर त्यो पर्याप्त छैन।
थुप्रै संरचनात्मक काम अझै बाँकी
इञ्जिनियर कुशुम भट्टराईका अनुसार पश्चिमतर्फको प्यारापिटमा ढलान बाँकी छ भने पूर्वपट्टि नयाँ प्यारापिट बनाउनु छ। मैदान सम्याउने, ग्राभेल तथा माटो फिलिङ, दुबो रोप्ने, चार ठूला र नौ साना फ्लडलाइट जडान, डिजिटल डिस्प्ले बोर्ड निर्माण, सर्भिस लेन, खानेपानी ट्याङ्की र टिकट घर निर्माणका काम बाँकी छन्।
निर्माण व्यवसायीको गुनासो: भुक्तानी बिना काम सम्भव छैन
सुनकोसी कन्ट्रक्सनका सञ्चालक नारायण प्रसाद भट्टराईले करिब दुई वर्षअघि सम्पन्न कामको दुई करोड रुपैयाँ भुक्तानी नपाएको बताए। उनले भने, “पुरानो भुक्तानी पाएका भए तोकिएकै समयमा काम सक्थ्यौं।” अब एक हप्ताभित्र १००–२०० मजदुर परिचालन गरेर बाँकी काम सुरु गर्ने तयारी भइरहेको जानकारी पनि उनले दिए।
भुक्तानी र अवरोधरहित वातावरण भए समयमै काम सकिने दाबी
भट्टराईले कार्यालयले भुक्तानी रोकेन र फिल्डमा अवरोध नआएमा तोकिएको म्यादभित्रै सम्पूर्ण निर्माण सकिने प्रतिबद्धता जनाएका छन्।