जडीबुटी बसपार्कमा शुल्क विवाद : पूर्व अरनिको यातायातका अध्यक्ष र बसपार्क संयोजक कुटपिट

भक्तपुर — जडीबुटी बसपार्कमा शुल्क विवाद चर्किएपछि पूर्व अरनिको यातायात प्रालिका अध्यक्ष केदार क्षेत्री र बसपार्क सञ्चालक समितिका संयोजक रवि सिवाकोटीमाथि मजदुर र व्यवसायीहरूले कुटपिट गरेका छन्।
शुल्क सम्बन्धी छलफलकै क्रममा दुवै पक्षबीच हातपात भएको दुवै पक्षले आरोप लगाएका छन्।

शनिबार साँझ बसपार्कमा भएको छलफलका क्रममा शुल्कबारे वादविवाद बढ्दै गएपछि क्षेत्री र सिवाकोटीमाथि आक्रमण भएको हो।
क्षेत्रीका अनुसार ‘एमाले र माओवादी निकट मजदुरहरूले योजनाबद्ध रूपमा’ आफूमाथि आक्रमण गरेका हुन्।

पूर्व अरनिको यातायात प्रालिले आफ्नै लगानीमा काठमाडौं महानगरपालिका–३२, जडीबुटीमा निर्माण गरिएको बसपार्क दुई वर्षअघि सञ्चालनमा ल्याएको थियो।
झन्डै १० करोड रुपैयाँको लगानीमा बनेको उक्त बसपार्क सञ्चालनमा आएको भए पनि हालसम्म कुनै औपचारिक अनुमति (इजाजतपत्र) प्राप्त हुन सकेको छैन।
प्रदेश सरकारसँग स्थायी अनुमतिका लागि अनुरोध गरेको भोलिपल्ट नै आक्रमण भएको अध्यक्ष क्षेत्रीले बताए।

विवादको कारण

बसपार्कमा गाडी प्रवेश गर्नासाथ ३५० रुपैयाँ शुल्क असुल्ने, र गाडी नआए पनि शुल्क तिर्नुपर्ने बाध्यता लगाइएको भन्दै व्यवसायीहरू असन्तुष्ट छन्।
उनीहरूले यसलाई ‘अत्याचारपूर्ण शुल्क व्यवस्था’ भनेका छन्।
अर्कोतर्फ, अध्यक्ष क्षेत्रीले भने अन्य यातायात संघहरूभन्दा आफूहरूको शुल्क न्यून रहेको दाबी गरेका छन्।

आक्रमण र आरोप–प्रत्यारोप

मजदुर र व्यवसायीहरूले क्षेत्रीमाथि धम्कीपूर्ण व्यवहार र एकपक्षीय निर्णय गरेको आरोप लगाएका छन्।
क्षेत्रीको समूहले पनि व्यवसायीहरूलाई कुटपिट गरेको, जसमा केही व्यवसायीहरू घाइते भएको बताइएको छ।

आर्थिक अनियमितता र बीमा विवाद

व्यवसायीहरूको आरोपअनुसार, अध्यक्ष क्षेत्रीले कम्पनीका गाडीहरू दर्ता गर्दा ५ लाख रुपैयाँसम्म अतिरिक्त शुल्क असुलेका छन्।
त्यस्तै, कम्पनीअन्तर्गतका सवारीहरूको बीमा आफ्नी श्रीमती कार्यरत IME बिमा कम्पनीमार्फत गराइँदै आएको र त्यसबापतको २० प्रतिशत कमिसन अध्यक्षले नै लिने गरेको आरोप छ।
क्षेत्रीले भने सो कमिसन रकम संस्थामै बुझाएको दाबी गरेका छन्।

मजदुर र व्यवसायीहरूको ज्ञापनपत्र

मजदुर र व्यवसायीहरूले शनिबार अध्यक्ष क्षेत्रीलाई बुझाएको ज्ञापनपत्रमा निम्न मागहरू उल्लेख छन् —

• तत्काल वैधानिक अधिवेशन घोषणा गरी नयाँ कार्यसमिति गठन होस्।

• बसपार्क तथा कम्पनीको सम्पूर्ण आय–व्यय विवरण सार्वजनिक गरियोस्।

• अत्यधिक शुल्क र क्यु महसुल खारेज गरी बसपार्क निःशुल्क घोषणा गरियोस्।

• सवारी धनीहरूलाई न्यायसंगत दरमा शेयर वितरण गरियोस्।

• सबै कम्पनीका गाडीहरू दर्ताका लागि खुला व्यवस्था गरियोस्।

• मजदुर र व्यवसायीमाथिको धम्की र गुण्डागर्दी बन्द गरियोस्।

• अध्यक्ष क्षेत्रीले तत्काल राजीनामा दिउन्।

• संस्थाको सम्पत्तिमा पारदर्शिता र आर्थिक अनियमितता अन्त्य गरियोस्।

• अध्यक्षको श्रीमती कार्यरत बीमा कम्पनीबाट आएको कमिसन रकम सार्वजनिक गरियोस्।

• “पूर्व अरनिको यातायात प्रालि” नाम यथावत राखियोस्।

विवादले अहिले पूर्व अरनिको यातायात प्रालि र जडीबुटी बसपार्कको सञ्चालन व्यवस्थापनलाई थप अनिश्चित बनाएको छ।